【ゆきお地域物語 #13】日本商舖門前嗰隻狸猫，到底係咩黎？
ゆきお地域物語 #13
信樂狸——日本商舖門前嗰隻狸猫，到底係咩黎？
每一隻ゆきお，都藏著一個日本地區小故事。
去日本旅行，你一定喺好多餐廳、居酒屋、商店門口見過一隻肥肥圓圓、帶笠揹酒壺嘅陶瓷狸猫。呢隻就係信樂狸——日本最具代表性嘅吉祥物之一，但佢嘅故事，遠比外表豐富得多。
信樂 狸（しがらき たぬき）
信樂燒（信楽焼）係滋賀縣甲賀市信樂町出產嘅傳統陶器，係「日本六古窯」（日本六大古老陶器產地）之一，有逾1,200年嘅歷史，在日本陶藝界地位崇高。而信樂燒最廣為人知嘅代表作，就係呢隻笑面迎人嘅信樂狸。
「ポンポコリン」係狸猫打肚鼓嘅擬聲詞。相傳信樂燒嘅始祖年輕時在京都修行，有一夜在月光下見到大狸小狸「ポンポコ」打住肚鼓嬉戲，心生感動，因而以此為靈感創作出信樂狸嘅圓滾造型，令信樂狸由出生就帶著一份奇幻與歡樂嘅氣息。
信樂狸到底有幾勁？
🦝 人氣高企——全日本無人不識
信樂狸海外知名度雖然不及招財貓，但在日本國內幾乎係無人不識。唔止滋賀縣，全國各地嘅餐廳、居酒屋、酒舖、商店門口都會擺放信樂狸，係日本街頭風景不可或缺嘅一部分。
🎯 點解係狸猫——語言諧音嘅力量
日文「たぬき（狸）」同「他抜き（たぬき）」讀音完全一樣，而「他抜き」係「超越他人、脫穎而出」嘅意思。正係呢個諧音，令狸猫成為代表「在競爭中勝出」嘅吉祥象徵，特別受商家、考生、職場人士歡迎。
📰 爆紅原因——昭和天皇一首詩
1951年，昭和天皇巡幸信樂，沿途見到成排嘅信樂狸歡迎擺設，龍心大悅，感動到即興作詩一首讚頌。事件經報紙廣泛報道後，信樂狸一夜之間爆紅全日本，訂單蜂擁而至，從此奠定信樂狸不可撼動嘅地位。
身上隱藏8個開運寓意——八相緣起
信樂狸絕唔係淨係得個靚，佢身上嘅每一個部位都有深刻嘅寓意，合稱「八相緣起」——係一套完整嘅處世與做生意哲學：
- 笠（編笠）——防範意外，保護自己。做事要有防患意識。
- 目（大眼）——一眼關七，唔錯過任何機會。洞察力係成功嘅關鍵。
- 德利（酒壺）——擁有品德，不愁吃喝。有德者自有福報。
- 顏（笑臉）——常帶笑容，維繫人際關係。笑容係最好嘅名片。
- 腹（大肚）——要有「大肚量」嘅決斷力。遇事沉著，勇於決策。
- 通帳（通い帳）——做人、做生意信用為先。信用比金錢更重要。
- 金袋（錢袋）——財運要懂得善加運用。財富係工具，唔係目的。
- 尾（粗尾巴）——做事有頭有尾。堅持到底，善始善終。
八相寓意涵蓋「防災、洞察、品德、人緣、膽量、信用、財運、毅力」，難怪歷代商家都視之為最佳守護神。
招財貓 vs 信樂狸——同樣招福，方法不同
兩者都係日本代表性吉祥物，同樣寓意招福、好運、生意興隆，但核心理念唔同：
招財貓｜招福——主動出擊，招客、招財、招良緣，把好運「招進來」。強調吸引外在嘅好運到來。
信樂狸｜八相緣起——偏重修身，以笑容、信用、處世之道為本，「迎接好運」。強調靠自身品格修煉去配得上好運。
簡單講：招財貓係「招運到」，信樂狸係「先做好自己再招運到」。兩者並非對立，反而互補——唔少日本商家都係兩隻一齊擺。
共同點：都係日本代表性吉祥物，寓意招福・好運・生意興隆。
「唔止做生意，我仲適合考生、職場人士和新居家庭，因為能保佑你在競爭中脫穎而出、免除災難並帶來全家平安。」
——信樂狸 溫馨提示
下次黎日本旅行時，除左招財貓外，都可以考慮下買一隻信樂狸做手信喇。
ゆきお地域物語 #13｜信樂 狸
想睇更多日本文化小知識？Follow us on Instagram @iroiro.selectshop